Fshati Turistik Kasollet e Zanave është një destinacion i veçantë i vendosur në zemër të natyrës së virgjër të Prapashticës, vetëm 30 kilometra nga Prishtina. I shtrirë në një lartësi prej rreth 1000 metrash mbi nivelin e detit, fshati ofron pamje mbresëlënëse, ajër të pastër dhe një klimë të freskët gjatë gjithë vitit. Larg zhurmës urbane, Kasollet e Zanave është një vend për qetësi, pushim dhe rilidhje të sinqertë me natyrën.

 

 

I frymëzuar nga tradita shqiptare dhe i ndërtuar mbi parimet e turizmit të qëndrueshëm, fshati përbëhet nga 22 kasolle prej druri dhe guri natyral, të vendosura harmonikisht në një ambient kodrinor. Çdo kasolle është konceptuar për të ofruar rehati dhe ngrohtësi, duke ruajtur thjeshtësinë dhe lidhjen me jetën rurale. Këtu, luksi gjendet në qetësi, hapësirë dhe autenticitet.

 

 

Kasollet e Zanave nuk është vetëm një vend pushimi, por një model i turizmit të përgjegjshëm.
Me një ekip të përkushtuar dhe një organizim profesional që përfshin mikpritjen, kujdesin për kafshët dhe menaxhimin e përvojave, çdo detaj është menduar për ta vendosur vizitorin në qendër të përvojës.

 

 

Në zemër të fshatit ndodhet restoranti, ku shërbehen receta tradicionale të përgatitura me përbërës të freskët nga sera jonë dhe fermerët lokalë. Mëngjeset në verandë, darkat pranë zjarrit dhe atmosfera autentike e bëjnë restorantin një vend ku shija ndërthuret me kujtesën dhe traditën shqiptare.

 

 

Fshati ofron gjithashtu hapësira të dedikuara për relaks dhe bashkëbisedim, si kafehanet pranë Kopshtit të Kafshëve dhe parkut të lojërave, si dhe sheshin dhe pazarin e fshatit, ku vizitorët mund të gjejnë produkte artizanale dhe ushqime tradicionale të përgatitura nga komuniteti lokal.

 

 

Një nga shtyllat kryesore të Kasolleve e Zanave është Kopshti i Kafshëve, një hapësirë edukative dhe rekreative ku vizitorët, veçanërisht fëmijët, mund të ndërveprojnë me kafshë të ndryshme dhe të njohin nga afër jetën në fshat. Kjo përvojë shoqërohet me aktivitete të udhëhequra, shfaqje edukative dhe evente sezonale që krijojnë kujtime të veçanta për të gjithë familjen.

 

 

Përtej relaksit, fshati ofron një gamë të gjerë përvojash aktive gjatë gjithë vitit – nga kalërimi, shëtitjet me qerre kuajsh dhe ecjet në natyrë, deri te aktivitetet dimërore dhe programet për fëmijë, familje, grupe dhe kompani.

 

 

Çdo vizitë në Kasollet e Zanave kontribuon drejtpërdrejt në zhvillimin e zonave rurale, në fuqizimin e grave lokale përmes punësimit dhe trajnimit, dhe në edukimin e brezave të rinj për ta dashur dhe respektuar natyrën.